Монголын хүүхдийн спортын өвлийн VIII наадамд манай аймгийн баг тамирчид II байрт орлоо

Монголын хүүхдийн спортын өвлийн VIII наадамд манай аймгийн баг тамирчид II байрт орлоо 

 

 Энэ сарын 17-23-ны өдрүүдэд Улаанбаатар, Орхон аймагт нэгэн зэрэг зохион байгуулсан Монголын хүүхдийн спортын өвлийн VIII наадам амжилттай болж өндөрлөлөө. Наадамд эх орны өнцөг булан бүрээс өсвөрийн шилдэг 546 тамирчин 478 багц медалийн төлөө “Мөрөөдлийнхөө төлөө шударгаар өрсөлдье” уриан дор өвлийн спортын найман төрлөөр хурд, хүч авхаалж самбаагаа сорив. Манай аймагт зохион байгуулсан гүйлтийн цана, уулын цана, снөүбоардийн төрөлд 13 аймаг, нийслэлийн 6 дүүргийн 200 гаруй тамирчин оролцсон. Наадмын нийт дүнгээр Хөвсгөл аймаг тэргүүлсэн бол Орхон аймгийн тамирчид 10 алт, 13 мөнгө, 9 хүрэл медаль хүртэж II байрт шалгарсан амжилтыг үзүүлэв. Засгийн газрын тогтоолоор хоёр жилд нэг удаа зохион байгуулдаг тус наадмын онцлог нь анх удаа хоёр өөр нутаг дэвсгэрт нэгэн зэрэг зохион байгуулсан нь байв. Мөн тусгай олимпын спортын хоёр төрөл энэ наадмын хөтөлбөрт багтсан. Эх орны баруун хязгаар Баян-Өлгий аймгаас Монголын хүүхдийн өвлийн спортын наадамд анх удаа тамирчнаа оролцуулсан, өвлийн спортын олон төрлөөр улсын дээд амжилт олноор төрсөн, олон тамирчид хувийн амжилтаа ахиулсан гээд онцлог үйл явдлаар дүүрэн болж өндөрлөлөө.