ХАЯГДЛЫН АЖ АХУЙН ДАЛАНГААС УС ШҮҮРЧ БАЙСНЫГ ӨНӨӨДӨР ӨГЛӨӨ ЗОГСООЛОО

Энэ сарын 23-ны өдөр Эрдэнэт үйлдвэрийн Хаягдлын аж ахуйн далангаас ус шүүрч, Говил багийн айлын хашаагаар ус урсаж байна гэсэн мэдээллийн дагуу тус үйлдвэрийн ХАБЭА, Үйлдвэр техникийн хэлтэс, Баяжуулах үйлдвэр болон Орхон аймгийн Онцгой байдлын газар, Дотоодын цэрэг зэрэг холбогдох мэргэжлийн байгууллагын хамтарсан баг нөхцөл байдлын шалтгааныг тогтоохоор шуурхай арга хэмжээ авч ажиллалаа.

Үүссэн нөхцөл байдалтай газар дээр нь танилцахад, Хаягдлын аж ахуйн усан сангийн Говил талын хэсгийн хамгаалах далангийн доороос ус шүүрч байсан бөгөөд цаг алдалгүй булингын хаялтын цэгийг өөрчлөх, дотор даланг хүчитгэх, булингын урсгалын чиглэлийг өөрчлөх, шүүрч буй усыг зогсоох зэрэг арга хэмжээ авсны үр дүнд усны хэмжээ, хурд, Говил багийн суурьшлын бүс рүү урсаж байсныг өнөөдөр өглөө 09:00 цагт бүрэн зогсоожээ. Мөн далангаас шүүрэн урсаж байсан усны голдирлыг өөрчлөн шуудуу татан, эзэнгүй газраар урсах нөхцөлийг бүрдүүлээд байгаа аж.

Ингэснээр тус багийн ойр орчмын иргэд автомашин болон явганаар зорчих, иргэдийн өмч хөрөнгө сүйдэх, хохирол учрахаас урьдчилан сэргийлэх боломжтой болгоод буйг Эрдэнэт үйлдвэрийн Үйлдвэрлэл, техникийн хэлтэс, Гамшгаас хамгаалах хэлтсээс мэдээллээ. Түүнчлэн Хаягдлын аж ахуйн далангаас шүүрч байгаа уснаас авсан дээжийн шинжилгээгээр хүн, малын эрүүл мэндэд сөрөг нөлөөлөх зүйл лабораторийн шинжилгээний хариугаар тогтоогдоогүй гэж Байгаль орчин, ногоон хөгжлийн хэлтэс онцлов.

М.Балжинням

Б.Сэр-Оддамба